”თარგმნეს” პრეზენტაცია , თვითმმართველობა და ცემა-ტყეპა ”თეთრი ტაძრის” მაღალ კედლებში

რამდენიმე დღეა სხვადასხვა სოციალური ქსელიდან აქტიურად გვესმოდა ”თარგმნეს” შესახებ. უნივერსიტეტის რამდენიმე სტუდენტმა შეგვახსენა ”რიდერების” და არაქართული ლიტერატურით სწავლების შესახებ უნივერსიტეტში. საღამოთი, სადღაც სტენდზე წავაწყდი წარწერას, რომ დღეს იმართებოდა ”თარგმნეს” საინიციატივო ჯგუფის მიერ დაგეგმილი პრეზენტაცია და მათი ნამოღვაწარის წარდგენა სტუდენტებისა და სხვათა წინაშე. ეს პრობლემა დიდი ხანია მაწუხებს და ვიფიქრე, რომ შემდეგ აუცილებლად დამეწერა ბლოგზე ამასთან დაკავშირებით. თუმცა ის, რაც შემდეგ მოხდა და ეჭვი მაქვს, რომ ახლაც და აწი კიდევ მოხდება, ”რიდერებზე” წერის სურვილი საერთოდ დამიკარგა და სხვა პრობლემაზე უნდა დავწერო.

შეხვედრა თავიდან საკმაოდ კორექტულად და მშვიდად მიდოდა, თუმცა სათარგმნი წიგნების თემამ გვერდი ვერც ჩვენს თვითმმართველობას აუარა. უნივერსიტეტელმა და ჩემმა ახლობელმა, წარმოთქვა დაახლ. მსგავსი შინაარსის ფრაზა, რომ ”…ტაშ-ფანდურებს და გართობას , იმ ფულის დახარჯვა სხვადასხვა ორგანიზაციების მიერ, აჯობებდა ამ სახსრებით წიგნები ეთარგმნათ….” შემდგომშიც რამდენიმე სტუდენტი შეეხო თვითმმართველობას, თუმცა უნდა ვთქვა, რომ ეს იყო უბრალოდ კრიტიკა და არა პიროვნული ლანძღვა ვინმესადმი. როგორცა ჩანს, თვითმმართველობიდან ეს სიტყვები პირად შეურაცხყოფად მიიღეს , რასაც ჯერ დარბაზში ოპონირება და დებატები მოჰყვა, ხოლო შემდეგ , ისე როგორც ეს ქართველებს შეგვეფერება, საქმის განხილვამ კორიდორებში , ხელით და მუშტით , გადაინაცვლა.

მას მერე, რაც ჩემმა ნაცნობმა დატოვა დარბაზი და წავიდა, თუ არ ვცდები ორმა პიროვნებამაც ,საჩქაროდ დატოვა პრეზენტაცია. ხუთიოდე წუთის შემდეგ , აუდიტორიის წინ ყვირილის და მამაპაპური შეძახილების ხმა გაისმა და აუდიტორიაში თვალჩალურჯებული სტუდენტი შემოვარდა. (ხო, დამავიწყდა მეთქვა, რომ იმ ხუთ წუთში კიდევ სხვებიც გავიდნენ გარეთ)

მოკლედ, რამდენიმე სტუდენტი ერთმანეთს თავგამეტებით ურტყამდა, იქვე აუდიტორიის წინ. ჩემ მეგობარს შევეხმიანე, მაინტერესებდა მას ხომ არ შემთხვევია რამე, თუმცა ხმაურში წესიერად ვერაფერი გავიგე და გულდამშვიდებულმა, რომ ის კარგად იყო, პრეზენტაციას მივუბრუნდი. რაოდენ სამწუხაროც არ უნდა იყოს, ბ-ნი ბერძენიშვილის სიტყვის პარალელურად, დაპირისპირებულმა მხარეებმა ჩხუბი არ შეწყვიტეს… ამ დროს, აუდიტორიაში სახეგაფითრებული, პიჯაკშემოხეული და ნაცემი ჩემი მეგობარი შემოვარდა, მე რომ სამშვიდობოს დავიგულე და მიკროფონთან განაცხადა , რომ მისივე სიტყვებისდა გამო მას ფიზიკურად გაუსწორდნენ.

მეგობრებო, ჩემო თვითმმართველობის პატივცემულო წევრებო, გოგონებო და ბიჭებო, უნივერსიტეტის სტუდენტებო! სირცხვილია, სირცხვილია უნივერსიტეტელი სტუდენტები ერთმანეთს ცემა-ტყეპით , ხელჩართული და ფეხჩართული ჩხუბით, ფიზიკურად გაუსწორდეთ ვინმეს განსხვავებული აზრისდა გამო, კრიტიკის გამო. უნდა გახსოვდეთ, თქვენ არც ქრისტეს ნაცვლებად ხართ მოვლინებულნი უნივერსიტეტში და არც შეუმცდარი ადამიანები. ნაცვლად იმისა, რომ თქვენივე კრიტიკოსები შეირიგოთ და აუხსნათ, რომ თარგმნა და სილაბუსების მოწესრიგება თქვენი საქმე არ არის, ყველას ცემა-ტყეპით და მუშტებით უსწორდებით. ეს არის ვაჟკაცობა? არ ვარ არც დეკანატის, და მით უმეტეს არც თვითმმართველობის წინააღმდეგი, დიახ , მე ვიცი , რომ სტუდენტს გართობაც სჭირდება , ტაშ-ფანდურიც , ინტელექტუალური თამაშიც და ქუჩის კალათბურთიც. მეც, რაღაცებში ვირებ მონაწილეობას, მაგრამ ეგ გაძლევთ კიი იმის უფლებას, რომ საკუთარი შეცდომები, ვერ დაინახოთ და მით უმეტეს ვიღაცებს ფიზიკურად გაუსწორეთ? თქვენგან, როგორც თბილისის სახელმწიფო უნივერსიტეტის სტუდენტებისგან უნდა იღებდნენ მაგალითს ადამიანობაში, ”სიკარგკაცეში” და რაციონალურად აზროვნებაში და არა წიხლების რტყმევაში. სირცხვილია, ადამიანს დაესიოთ, როგორც სვავები ლეშს და ურტყათ გამეტებით. რომ არა უნივერსიტეტის დაცვა, რომელიც გადაეფარა ”ტაშ-ფანდურის” მთქმელს, ალბათ აფექტში შესულები სასიკვდილოს გაიმეტებდით. ვფიქრობ, უნივერსიტეტელები უნდა ვიყოთ როგორც ერთი დიდი ოჯახის წევრები და რაღაც სისულეებისდა გამო, თუნდაც კრიტიკის გამო, თქვენივე თანაკურსელების წინააღმდეგ ხელით არ უნდა მიდიოდეთ. მგონი შეუფერებელია თქვენს სტუდენტის სტატუსთან ეს ყველაფერი. კონცერტებიც გვინდა, ნათარგმნი ”რიდერებიც” და ექსკურსიებიც, არც არავინ ძულს და ეზიზღება პირადად მერწმუნეთ, არც ჯინში გიდგათ ვინმე და მით უმეტეს თვითმმართველობის კრიტიკით არავინ იპიარებს თავს, უბრალოდ სათქმელს ყოველთვის იტყვიან. ამხელა ერთეულს, (თვითმმართველობს) ყოველთვის გეყოლებათ ვინმე კრიტიკოსი, ვინც არასასურველს იტყვის თქვენზე, მაგრამ ქუჩის იდეოლოგიით და ქურდული შეგნებით ამას არ უნდა ებრძოდეთ.

ისე კი გახსოვდეთ, სადაც ინდულგენციებს ყიდიან, იქ რეფორმაციაც მალე იწყება ხოლმე 🙂

არ გინდათ რა ცემა – ტყეპა, ძველ ბიჭური მეთოდებით უნივერსიტეტში ხელმძღვანელობა. სირცხვილია!!!